Christine & Damian

Nu eimal schlafä und denn dörf ich de schöni Tag vode Christine & em Damian mit minere Kamera begleite. Wie vor jedem Hochziit stiigt mini Vorfreud jetzt vo Stund zu Stund. Regelmässig lueg ich de Wetterbricht dure, mini Usrüschtig wird greiniget und alles wird parat gleit. Ich gah de Ablauf vom Tag, wenn das ich wo muess sii, es paar Mal dure. Es fangt chli a chriblä und ich gmerke wieder; ich liebes so sehr, dass ich a Täg wo so Mänsche wie d Christine & de Damian ihri Liebi fiired, als Fotografin dörf begleite und ihne d Erinnerige, das wo am Schluss vo dem Tag nu bliibt, dörf feschthaltä. Churz nachdem d Christine & de Damian Eltere vom Kimo wordä sind, ha ich sie zum erstä Mal dörfe mit minere Kamera gu bsueche und ihres Familieglück uf Bilder festhaltä. Im letschtä Jahr ha ich sie bi wunderschöner Herbst-Stimmig wieder dörfe gseh und fotografiere. Es paar Bilder wo dete entstande sind, dörf ich üch jetzt da ufem Blog zeige.