Tanja & Martin

Immer wenn ich es Hochziit fotografiert han, und s Bruutpaar iverstande isch tue ich uf minere Facebook Siite (https://www.facebook.com/lauravercellonefotografie) es Bild als Vorschau zeige, für alli Lüüt wo mini Arbeit gärn verfolget, damit sie gsehnd was ich grad mache! :-) Das Jahr han ich im Oktober es Bild ine ta, vom Hochziit und dezue gschriebe dases s letschtä Hochziit vode Saison 2013 gsi isch. Es paar Wuche spöter han ich denn es Mail vode Tanja übercho. Sie hed mier gschriebe, dass sie weiss dass mini Saison eigentlich fertig isch, aber wenn ich Ziit und au Luscht heig dörf ich mini Hochziitskamera sehr gärn numal fürenä und ihri grossi Tag in Bilder festhaltä. Ich han mich wahnsinnig gfreut wo ich das Mail gseh han. D Tanja & de Martin sind Chunde vo mier wo ich scho sehr is Härz gschlosse han. Ich han sie zwei s erstämal dörfe go fotografiere wo d Tanja ihres chliine Wunder im Buuch treid hed, denn wieder wo d Enya da gsi isch, d Taufi vode Enya und jetzt ihre schöni Tag. Ich wür säge sie sind es super Biespiel defür, warum dass ich min Job so sehr liebe. Dass ich Mänsche wie sie dur das so guet dörf kännelerne und ihne Erinnerige dörf machä und gä vo so wichtige Momänt i ihrem Läbe.

D Tanja & de Martin hend sich amene wunderschöne sehr chalte ( d Tanja isch sehr tapfer gsii für d Bilder! ;-) ) Wintertag i chliinem Chreis in Stans s Ja-Wort gä.

Und da wär sie, ihre chliine Schatz d Enya. :-)

S Standesamt isch amene Ort gsi wo de Wiehnachtsmärcht grad dure gange isch, das hemmer natürlich müesse usnütze.

Und mitem Zug isch wiiter an Apéro gange! :-)

Tanja & Martin, ich danke üch vo ganzem Härze, dass ich au a dem wichtige Ereignis für üch han dörfe debii sii! :-)