Karin & Beat

D Karin und de Beat hend Afang Mai ihre schöni Tag gfiiret! D Biise isch gange, drum isches au rächt chüehl gsi. Ich wür jedoch ganz klar säge, dass mer das uf de Bilder nid gsehd, da sich die zwei nüt hend la amerkä! :-) Ide Chilä z Altendorf hend sie sich s erschtä Mal gseh a dem Tag, bevor mier denn vor de Trauuig sind gu fotografiere. S erstämal han ich i dem Dorf wo ich ufgwachse bim es Hochziit gha, super isches gsi! :-) Alli wo min Blog scho länger verfolgid kännid au d Tafelmajorin vo ihne. D Yvonne, wo ich da scho am füfte Hochziit (inklusive ihrem eigne) han dörfe zämeschaffe. Eimal isch sie en wunderschöni Bruut gsi, eimal isch sie Gast gsi und drüümal isch d Yvonne en super Tafelmajorin gsi wo mier d Arbeit mit ihrer super Organisation um einiges liechter gmacht hed! :-) D Karin & de Beat sind bide Märchler Trachtelüt debii, wo immer luegid, dases au während em Apéro en gueti Verpflegig und Stimmig gid. Natürlich tanzids au immer, wo ich ihne ewig chönnti zueluegä! :-)

Karin & Beat, für üchi gmeinsami Zuekunft wünsch ich üch nur s Beschti und danke üch vo ganzem Härze dass ich a dem schöne Tag han dörfe debii sii! :-)