Helena & Roman

Während ich de Blogitrag vode Helena & em Roman ihrem wunderschöne Tag für üch am Zämestelle und am Schriebe bin, chan ich nid ufhöre z lächle, nid ufhöre a all die unglaulich schönä Momänt zruggzdänke und vor allem immer und immer wieder so dankbar z sii, a so grossartige Täg vo Mänsche wie de Helena & em Roman dörfe debii z sii und die mit so viel Liebi & Persönlichkeit vorbereitete Täg für immer uf Bilder dörfe festzhaltä! Wie söll ich jetzt afange üch z erchläre was a dem Tag so schön gsi isch und warum die Zwei s perfektä Biespiel sind, warum das ich Hochziite so liebe? So Täg, wie de vode Helena & em Roman mit und dur mini Kamera dörfe mitzerläbe, die Magie und Liebi zwüschet zwei Mänsche amene Tag wies de gsi isch so intensiv dörfe z gseh und z gspüre, das gnüss ich so sehr a mim wunderschöne Job. Ich chönnt au d Bilder spräche laa und bin schier sicher ier würed mich au dur das verstah aber ich muess üch glich unbedingt es paar Wort dezue säge. Es faht scho alles bim Hüratsatrag a, wo d Helena vom Roman via Schnitzeljagd uf Paris (!!!) gfüehrt worde isch, wo er denn vor ihre am Ziel uf d Chnüü gange isch! D Helena hed ihre Wäg uf Paris gfilmet und es chliises Filmli druus gmacht, wo denn als Afang vode Trauuig zeigt worde isch, nachdem de Roman id Chile cho isch. Wo de Film fertig gsi isch, d Helena zu dem wunderschöne Atrag natürlich ja gesid hed, isch sie denn vo ihrem Mami id Chile inegfüehrt worde. Ja ier Liebe, scho dete isches ganz klar gsi, dases einigi Gäst zu Träne grüert hed. Nach de Trauuig isch de Tag mitemene Picknick wiiter gange, wo sogar s WC (natürlich au ufem Bild) eifach nur schön gsi isch. Ier lachid viellicht jetzt aber luegid das einisch a! :-) Aschlüssend sind die Zwei vo Ihrer Trauzügin überrascht worde, i dem am See es Böötli uf sie gwartet hed, wo sie sich chli hend chönne zruggzieh und gnüssä. Doch de wohl schönsti Teil, de Teil wo alles abgrundet und alles so unglaublich märlihaft gmacht hed isch wohl de Abig gsi. D Helena und de Roman sind zum Glück so muetig & zueversichtlich gsi, ihres Fäscht unter friiem Himmel zmitzt im Wald mit Liechterchettene, Strohballe, Band, Lagerfüür und Catering zplane. Eifach so wies ihne gfalle und wies so sehr zu ihne passt hed. D Entscheidig es paar Täg vorher, s Fäscht au würklich verusse durezzieh hed sich definitiv sehr glohnt! Es isch alles schlicht und eifach perfekt, märlihaft und so eifach und herrlich entspannt gsi.

Die wunderschöni Dekoration hed übrigens de Helena ihri Fründin, d Laura (www.schönraum.ch) gmacht, wo ich a dere Stell ganz gärn tue empfehle und ich denkes üch dur die schöni Deko wo ier uf de Bilder gsehnd au wird begeistere! Helena & Roman, ich möcht üch a dere Stell numal vo ganzem Härze DANKÄ säge, dass ich de wunderschöni Tag für üch han dörfe festhaltä und mit üch gnüssä! <3