2014

Wahnsinnig, wie schnell das Jahr wieder ume isch, das Jahr wo ich wieder so viel super Mänsche han dörfe kännelerne, wieder bi so vielne wunderschöne Augeblick han dörfe debii sii, und es Jahr, wo ich wieder han dörfe das machä, wo ich so sehr liebe! Für üch die Momänt dörfe für d Ewigkeit festzhaltä, so viel Liebi dörfe zgseh und zgspüre, genau das mini Liebe macht mich sehr sehr glücklich. Es isch au s erschtä Jahr gsi, wo ich de Schritt i die 100% Selbstständigkeit gwagt han, und ich chan mier schlichtwäg nümme vorstelle, wies vorher gsi isch. :-) Voll und ganz selbstständig zsii isch wahnsinnig schön, aber au mängisch schwierig. Schwierig, will mer muess lerne, dass mers würklich nid immer allne chan rächt mache, und das fallt mier wahnsinnig schwär. Au schwierig, will ich sit emene ziitli mitemene Tinnitus dur s Läbe ga, wo i stressige Situatione sich gärn immer chli stärcher zeigt. Aber eifach nur wunderschön, will ich dörf entscheide, wie mis chliine Gschäft söll sii, wases söll büüte und i welem Stil, dass das alles söll sii. Wunderschön, will ich mit dem, was ich machä, Mänsche dörf glücklich machä, a so vielne wuderschöne Ereignis dörf teilnä und so vieli Persönlichkeite dörf kännelerne, wo direkt is Härz gönd. Wunderschön, will bi mier drüümal ide Wuche, immer wenn ich in Spital Schwyz dörf, um die Babys, das nüüe Läbe unter üs gu fotografiere, will genau denn für mich immer d Welt stah bliibt für es paar Minute und ich eifach immer wieder fasziniert bin vo dene chliine Wunder. Wunderschön, will mich min Bruef immer wieder uffangt, wenns mier privat mängisch nid so guet gaht, will ich ganz genau weiss, dass ich a dem Punkt, wo ich stah, genau richtig bin. Wunderschön, wills ÜCH gid! Mini grossartige Chunde, mini Fründä, Blogläser, alli, wo mich uf Facebook oder Instagram verfolgid und unterstützed und natürlich au wäge minere Familie! Minä grossartige Eltere, mini Schwöster und minere grosse Liebi, wo immer immer für mich da sind, mier Tag für Tag es Team ersetzid, wo ich immer um Rat chan frage, so viel schöni Augeblick, wo ich han dörfe erlebe mit ihne, chan teile und au immer immer denn da sind, wenns mängisch nid so klapped, wies söll. DANKÄ üch allnä für das alles! DANKÄ üch vo ganzem Härzä allnä, dass es wiiters Jahr so wunder-wunderschön gsi isch. Startet guet is nüe Jahr mit üchne Liebschtä und lönds üch la guet ga. Ich freue mich sehr ufs 2015 mit üch allnä!